සරම්ප නිසා බංග්ලාදේශයේ ළමුන් දහසකට වඩා මරුට

මේ වනවිට බංග්ලාදේශයේ ළමුන් මිලියන 19.8කට අධික පිරිසකට සරම්ප එන්නත ලබාදී තිබේ. එසේ වුවද, දිනකට සැකසහිත නව සරම්ප රෝගීන් 1,000කට ආසන්න සංඛ්‍යාවක් තවදුරටත් වාර්තා වන බව සඳහන් වේ.

එන්නත් ලබා නොගත් ළමුන් වෙත ළඟාවීම සඳහා බංග්ලාදේශ රජය සැප්තැම්බර් 26 වැනිදා සිට එන්නත්කරණ වැඩසටහනේ "තීව්‍ර අදියරක්" ආරම්භ කිරීමට නියමිත බව යුනිසෙෆ් ආයතනය BBC වෙත පවසා ඇත.

ලෝක සෞඛ්‍ය සංවිධානයට (WHO) අනුව, මෙම වසරේ මාර්තු මාසය දක්වා බංග්ලාදේශය සරම්ප තුරන් කිරීමේ ඉලක්කය කරා "සැලකිය යුතු ප්‍රගතියක්" ලබා තිබුණි. කෙසේ වෙතත්, මේ වනවිට එම සංවිධානයේ දත්ත අනුව මෙම වසරේ ලොව වෙනත් කිසිදු රටකට වඩා වැඩි සරම්ප රෝගීන් සංඛ්‍යාවක් බංග්ලාදේශයෙන් වාර්තා වී තිබේ.

නවතම රජයේ සංඛ්‍යාලේඛන අනුව, ඉතා වේගයෙන් පැතිර යන සරම්ප රෝගය හේතුවෙන් මාර්තු මාසයේ සිට මේ දක්වා රෝගීන් 194,000කට අධික සංඛ්‍යාවක් වාර්තා වී ඇත. හුස්ම ගැනීමේදී, කැස්සෙන් හෝ කිවිසුම් යාමේදී නිකුත් වන බිඳිති මගින් සරම්ප පහසුවෙන් පැතිර යයි.

අඟහරුවාදා දිනයේදී පමණක් සැකසහිත සරම්ප ආසාදිතයන් අතරින් තවත් පුද්ගලයින් අට දෙනෙකු මියගොස් ඇති බව වාර්තා වේ.

මිලියන 178කට ආසන්න ජනගහනයක් සහිත බංග්ලාදේශයේ සරම්ප ව්‍යාප්තිය මේ වසරේ මාර්තු මාසයේදී සැලකිය යුතු ලෙස ඉහළ ගොස් තිබේ.

යුනිසෙෆ් ආයතනය පෙන්වා දෙන්නේ අධික ජන ඝනත්වය සහ කොවිඩ්-19 වසංගතය හේතුවෙන් සාමාන්‍ය එන්නත්කරණ වැඩසටහන් ප්‍රමාද වීම ඇතුළු කරුණු කිහිපයක් හේතුවෙන් මෙම තත්ත්වය තවදුරටත් උග්‍ර වූ බවයි.