ෂැංහයි නගරයට දරුණු සුළි කුණාටුවක් : ගුවන් ගමන් නවතී

බෙබින්කා සුළි කුණාටුව සඳුදා (16) එරට වේලාවෙන් උදෑසන 7:30 ට පමණ ෂැංහයි නුවර නැගෙනහිරට වන්නට පිහිටි ලින්ගං නගරයේ වෙරළබඩ ප්‍රදේශයට කඩාවැදුණු බව චීන කාලගුණ විද්‍යා දෙපාර්තමේන්තුව පවසයි.

ෂැංහයි හි පදිංචිකරුවන් දහස් ගණනක් ඉවත් කර ඇති අතර නගරයේ ප්‍රධාන ගුවන් තොටුපල දෙකේ සියලුම ගුවන් ගමන් නවතා ඇත.

වසර 75කට පසු ෂැංහයි නගරයට බලපෑ ප්‍රබලතම කුණාටුව බෙබින්කා සුළි කුණාටුව බව චීන රාජ්‍ය මාධ්‍ය පවසයි.

සුළි කුණාටුවේ අක්ෂයෙන් පැයට කිලෝමීටර 151 (පැයට සැතපුම් 94) දක්වා සුළගේ වේගයක් වාර්තා වූ බැවින් බලධාරීන් විසින් ඉහලම මට්ටමේ රතු අනතුරු ඇඟවීමක් නිකුත් කර ඇත.

මේ මාසයේ චීනයේ දකුණු හයිනාන් දූපත හරහා ගමන් කළ තවත් සුළි කුණාටුවක් වන යාගි නිසා එරට තුල අවම වශයෙන් පුද්ගලයින් සිව් දෙනෙකු මිය ගොස් 95 දෙනෙකු තුවාල ලැබීය.

යාගි සුළි කුණාටුව නිසා අග්නිදිග ආසියාවේ දරුණු ගංවතුර තත්වයන් ඇති වූ අතර වියට්නාමයේ සහ මියන්මාරයේ මිනිසුන් සිය ගණනක් මිය ගොස් තිබේ.