දකුණු අප්‍රිකානු රූ රැජින කිරුළු පළන් පළමු බිහිරි කාන්තාව බවට 28 හැවිරිදි ''මියා ල රූ'' පසුගියදා පත්වුණා ය.
ඒ, අවසන් වටයට සුදුසුකම් ලැබූ 'හිදිමා අඩෙට්ෂිනා' නම් තරගකාරියක ගේ නයිජිරියානු උරුමය ගැන දිගින් දිගටම සමාජ මාධ්‍ය ඔස්සේ අපවාදාත්මක මත පළකිරීම් හමුවේ, එම තරගකාරියට ඉන් ඉවත්ව යාමට බලකෙරෙන තැනට පත්වුණු තරගයකින් අනතුරුවයි.
මියා ල රූ කිරුළ දිනා ගැනීමෙන් අනතුරුව ප්‍රකාශ කර සිටියේ, ''සමාජයෙන් කොන් කර ඇතැයි හඟින අයට සිය සිහින සාක්ෂාත් කර ගැනීමට තමන්ගේ ජයග්‍රහණය උපකාර වනු ඇතැයි සිතන බවයි''.
ඇය වැඩිදුරටත් පැවසුවේ "මූල්‍යමය වශයෙන් අපහසුතා ඇති හෝ විශේෂ අවශ්‍යතා සහිත" අයට උපකාර කිරීමට ඇයට වුවමනා බවයි.
"කළු-කළු වෛරයේ" ගොදුරක්
23 හැවිරිදි නීති ශිෂ්‍යාවක් වන 'හිදිමා අඩෙට්ෂිනා' පසුගිය සතියේ දී තරගයෙන් ඉවත් වූයේ ඇයගේ මව දකුණු අප්‍රිකානු කාන්තාවක ලෙස පෙනී සිටිමින් සිය සැබෑ අනන්‍යතාවය වසන් කරන බවට එල්ල වූ චෝදනා හේතුවෙනි.
අඩෙට්ෂිනා නයිජීරියානු පියෙකුට සහ මොසැම්බික් සම්භවයක් ඇති මවක දාව දකුණු අප්‍රිකාවේ උපත ලැබූ තරුණියකි.
රට නියෝජනය කිරීමට ඇයට ඇති අයිතිය ප්‍රශ්න කරමින් සති ගණනාවක සිට සමාජ මාධ්‍ය ඔස්සේ ඇයට අපවාද එල්ල වූ අතර එලෙස අපවාද කළ පුද්ගලයින් අතර කැබිනට් අමාත්‍යවරයෙක් ද සිටියි.
දකුණු අප්‍රිකානු නොවන වෙනත් අප්‍රිකානු රටවලින් පැමිණෙන හෝ සම්භවයක් ඇති පුද්ගලයින් ඉලක්ක කරගනිමින් වෛරිසහගත වෙන්කොට සැලකීම් සිදු කෙරෙන "afrophobia" නම් භීතිකාවේ එනම්, "කළු-කළු වෛරයේ" ගොදුරක් බවට තමන් පත්ව ඇතැයි හිදිමා අඩෙට්ෂිනා පැවසුවා ය.
English
