ජපානයට ප්‍රබල භූමිකම්පාවක් : සාප්පු සංකීර්ණයක සිටි බොහෝ දෙනෙක් අතුරුදන්

එසේම, අයෝන් මෝල් කුමාමොටෝ නම් සාප්පු සංකීර්ණයේ සේවකයන් යැයි විශ්වාස කරන බොහෝ දෙනෙක් අතුරුදහන් වී ඇති බව ජාතික පොලිස් ඒජන්සිය උපුටා දක්වමින් ජපානයේ මහජන විකාශන ආයතනයක් වන NHK වාර්තා කරයි.

එම වාර්තාවට අනුව, පොලිස් ආරංචි මාර්ග පවසන්නේ සේවකයින් 20 ත් 30 ත් අතර සංඛ්‍යාවක් සමඟ සම්බන්ධතා නැති වී ඇති බවත්, සාප්පු සංකීර්ණය තුළ සිරවී ඇත්දැයි සොයා බැලීමට හදිසි සේවා කටයුතු කරමින් සිටින බවත්ය.

රික්ටර් මාපක 7.1 ක භූමිකම්පාවෙන් පසු සාප්පු සංකීර්ණයේ පිපිරීමක් පිළිබඳ වාර්තා වී තිබුණි.

එරට වේලාවෙන් පස්වරු 4:27 ට (GMT 07:27) කියුෂු දූපතේ භූමිකම්පාව ඇති වූ අතර, 150,000 කට වැඩි පිරිසකට ආරක්ෂිත ස්ථාන වෙත යන ලෙස දැනුම් දෙන ලදී. එසේම, නිකුත් කළ කෙටි සුනාමි අනතුරු ඇඟවීමක් පැයක් ඇතුළත ඉවත් කරගන්නා ලදී.

අද සිදු වූ මුල් භූමිකම්පාවෙන් පසු පසු කම්පන 61ක් වාර්තා වූ බව ජපාන කාලගුණ විද්‍යා ඒජන්සිය පවසයි.

නිවාස දහස් ගණනකට විදුලිය විසන්ධි වී ඇති අතර මාර්ගවලට හානි සිදුවී තිබේ.