අයහපත් කාලගුණයෙන් 6ක් මරුට : අයෙක් අතුරුදන්

ඊයේ (03) පැවති අධික වර්ෂාවත් සමඟ පොල්පිටිය මොරහේනේගම ප්‍රදේශයේ නිවසක් මතට පස් කන්දක් කඩා වැටීමෙන් කාන්තාවන් තිදෙනෙකු ඇතුළු පුද්ගලයින් සිව්දෙනෙකු මියගොස් තිබේ.

මියගිය අය අතර වයස අවුරුදු 47 සහ 83ක් වූ එම නිවසේ පදිංචි කාන්තාවන් දෙදෙනෙකු සහ මාතලේ ප්‍රදේශයේ සිට පැමිණ සිටි වයස අවුරුදු 22 සහ 58ක් වූ ඥාතීන් දෙදෙනෙකු සිටින බව පොලිසිය සඳහන් කළේය.

මේ අතර, නාවලපිටිය සෝලංකන්ද ප්‍රදේශයේ වෙළෙඳසැලක් මතට පස් කන්දක් කඩා වැටීමෙන් 67 හැවිරිදි පුද්ගලයෙකු ජීවිතක්ෂයට පත්ව ඇති අතර, එම අනතුර හේතුවෙන් නාවලපිටිය–දොලොස්බාගේ ප්‍රධාන මාර්ගයේ දෙවන කණුව ප්‍රදේශය සම්පූර්ණයෙන්ම අවහිර වී තිබිණි.

වටවල පොලිස් බලප්‍රදේශයේ ඥානානන්දගම ප්‍රදේශයේදී මහවැලි ගඟ හරහා ඇති පාලම මතින් ගමන් කරමින් සිටි 53 හැවිරිදි පුද්ගලයෙකු ගඟට වැටී දියේ ගිලී මියගොස් ඇති බවද පොලිසිය තහවුරු කළේය.

තවද, ගිනිගත්හේන පොලිස් වසමේ අඹගමුව ප්‍රදේශයේ ජලයෙන් යටවූ මාර්ගයක් හරහා ගමන් කරමින් සිටි 45 හැවිරිදි පුද්ගලයෙකු ජල පහරකට හසුව ගසාගෙන ගොස් අතුරුදන් වී ඇති අතර, ඔහු සොයා සෝදිසි මෙහෙයුම් තවදුරටත් ක්‍රියාත්මක බව පොලිසිය වැඩිදුරටත් සඳහන් කළේය.