ඩෙංගු මදුරු පරිශ්‍ර වැඩිම සංඛ්‍යාවක් පාසල්වලින් හමුවෙලා

ජාතික ඩෙංගු මර්දන ඒකකයේ අධ්‍යක්ෂ වෛද්‍ය කපිල කන්නන්ගර පැවසුවේ කර්මාන්තශාලා, රාජ්‍ය ආයතන ඇතුළු පොදු ස්ථානවලින් ද මදුරුවන් බෝ වන ස්ථාන හඳුනාගෙන ඇති බවයි.

වසරේ ගතවූ කාලය තුළ මෙරටින් වාර්තාවන ඩෙංගු රෝගීන් සංඛ්‍යාව 75,000 කට අධික අතර ඉන්, 52.7 % ක් වාර්තා වන්නේ බස්නාහිර පළාතෙන් ය.

ඩෙංගු මරණ ගණන 53ක් බව ජාතික ඩෙංගු මර්දන ඒකකය පවසයි.

ඩෙංගු වැළඳීමෙන් මියගිය පිරිසෙන් 37 දෙනෙකු කාන්තාවන් වේ. ඩෙංගු මරණ අතරට දරුවන් 05 දෙනෙකු ද ඇතුළත්.

විශේෂයෙන්ම කාන්තාවන් රෝගී ලක්ෂණ ඇති වූ වහාම වෛද්‍ය ප්‍රතිකාර සඳහා යොමු වන ලෙස ජාතික ඩෙංගු මර්දන ඒකකය ඉල්ලා සිටින අතර ඩෙංගු මරණ රැසකට හේතුව, ප්‍රමාද වී ප්‍රතිකාර සඳහා යොමුවීම බවත් නිවේදනය කරයි.