මොණරාගල – වැල්ලවාය මාර්ගයේ රිය අනතුරකින් 5ක් මරුට

අද (21) අලුයම වැල්ලවාය–මොණරාගල මාර්ගයේ කළු පාලම මතදී මෙම අනතුර සිදුව ඇති අතර, වැල්ලවාය දෙසට ධාවනය වූ ටිපර් රථයක් ප්‍රතිවිරුද්ධ දිශාවෙන් පැමිණි පුද්ගලයින් 10 දෙනෙකු රැගත් ට්‍රේලරයක් සහිත ට්‍රැක්ටර් රථයක ගැටී තිබේ.

අනතුරින් පුද්ගලයින් අටදෙනෙකු බරපතල තුවාල ලබා මොණරාගල රෝහලට ඇතුළත් කර ඇති අතර, ඉන් පස්දෙනෙකු මියගොස් ඇති බව පොලිසිය සඳහන් කළේය. තවත් තිදෙනෙකු රෝහලේ නේවාසිකව ප්‍රතිකාර ලබමින් සිටී.

මියගිය පුද්ගලයින් වයස අවුරුදු 21, 26, 31, 55 සහ 56 යන වයස්වල පසුවූ දොඩම්ගස්ලන්ද, බුත්තල සහ හොරබොක්ක ප්‍රදේශවල පදිංචිකරුවන් බව අනාවරණය වී තිබේ.

අනතුර සම්බන්ධයෙන් ටිපර් රථයේ සහ ට්‍රැක්ටර් රථයේ රියැදුරන් දෙදෙනාම අත්අඩංගුවට ගෙන ඇති අතර, මොණරාගල පොලිසිය වැඩිදුර විමර්ශන සිදු කරයි.