ශ්‍රී ලංකාව හා ඉන්දීය කණ්ඩායම අතර දෙවන ටෙස්ට් සටන ජයපරාජයෙන් තොරයි

කොළඹ SSC ක්‍රීඩාංගණයේ පැවති තරගය අවසන් වනවිට සිය දෙවැනි ඉනිම ක්‍රීඩා කරමින් සිටි ශ්‍රී ලංකා කණ්ඩායම කඩුලු 9ක් දැවී ලකුණු 429ක් රැස්කරගෙන සිටියේ ය.

ඒ වන විට ඔවුන් ඉන්දීය පළමු ඉනිමට වඩා ලකුණු 216ක් ඉදිරියෙන් පසුවිය.

ශ්‍රී ලංකා දෙවන ඉණිම සඳහා අංක 6 පිතිකරු ලෙස පිටියට පිවිස සොනාල් දිනූෂ නොදැවී ලකුණු 133ක් රැස්කළේ පන්දු 264කට මුහුණ දෙමිනි. ඔහුගේ ඉනිමට හතරේ පහර 8ක් සහ හයේ පහර 2ක් ඇතුළත් විය.

පසිඳු සූරියබණ්ඩාර ලකුණු 92ක්, කමිඳු මෙන්ඩිස් ලකුණු 55ක් සහ කේෂර නුවන්ත ලකුණු 46ක් රැස්කරමින් ශ්‍රී ලංකා ඉනිම ශක්තිමත් කළහ.

මෙම තරගාවලියේදී ටෙස්ට් වරම් හිමිකරගත් නවක පිතිකරුවෙකු වන කේෂර නුවන්ත, සොනාල් දිනූෂ සමගින් එක්ව 7වන කඩුල්ල වෙනුවෙන් පන්දු 246කින් ලකුණු 112ක විශිෂ්ට සබඳතාවක් ගොඩනැගීය.

කෙසේ වෙතත්, දෙරට අතර පළමු තරගය ජයගැනීමට සංචාරක ඉන්දීය කණ්ඩායම සමත්වූ නිසා ඔවුන් තරගාවලිය තරග 1-0ක් ලෙස ජයගැනීමට සමත් විය.