හිනිදුම වෙඩි තැබීමකින් පුද්ගලයින් තිදෙනෙකු මරුට

පොලිසිය සඳහන් ක‍ළේ යතුරුපැදියකින් පැමිණි පුද්ගලයින් දෙදෙනෙකු ඊයේ(30) රාත්‍රියේ වෙඩි තැබීම සිදුකර ඇති බවයි.

වෙඩි තැබිමෙන් තුවාල ලැබු පුද්ගලයින් තුන්දෙනා එම ස්ථානයේම මියගොස් තිබේ.

පොලිසිය සඳහන් කළේ පුද්ගලයින් 05 දෙනෙකු එම ස්ථානයේ ඊයේ(30) රාත්‍රීයේ 11 ට පමන මත්පැන් පානය කරමින් සිට ඇති බවයි. පසුව එම ස්ථානයට පැමිණි තුවක්කු කරු T56 ගිනි අවියකින් වෙඩි ප්‍රහාර 15 කට ආසන්න සංඛ්‍යාවක් එල්ල කර තිබේ.

වෙඩි තැබූ ස්ථානයේ සිටි තවත් පුද්ගලයින් දෙදෙනෙකු පලාගොස් දිවි බේරාගෙන ඇතැයි පොලිසිය සදහන් කළේ ය.

මෙලෙස වෙඩි වැදිමෙන් මියගොස් ඇත්තේ නවාතැන්පලේ හිමිකරු වන 55 හැවිරිදි මහාබෝධිවත්ත පනංගල පදිංචි පුද්ගලයෙක් වන අතර අනෙක් පුද්ගලයින් දෙදෙනා හිනිදුම හා අම්බලන්ගොඩ ප්‍රදේශයේ පදිංචිකරුවන් ය.

පොලිසිය සදහන් කළේ වෙඩි තැබීම සිදුවු ස්ථානය කලක් හෝටලයක් ලෙසට භාවිතා කර අත්හැර තිබු ස්ථානයක් බවයි.

newsfirst.lk