කෝටි එකහමාරකට අධික කේරළ ගංජා සමග පුද්ගලයෙකු මීගමුවේදී අත්අඩංගුවට

ඉන්දියාවේ සිට ධීවර බෝට්ටුවක් මගින් මීගමුව වෙරළ තීරයට ගෙන ආ මෙම ” කේරළ ගංජා ” තොගය , කුඩා ලොරි රථයක් මගින් කුරුණෑගල ප්‍රදේශය බලා ප්‍රවාහනය කරමින් සිටියදී , ලද බුද්ධි තොරතුරක් මත , මීගමුව මහහුනුපිටිය ප්‍රදේශයේ දීයි අත්අඩංගුවට ගෙන ඇත්තේ.

කිලෝ ග්‍රෑම් 85 ක් බරැති මෙම ” කේරළ ගංජා ” තොගය , පැකැට් 40 ක් තුළ අසුරා , ඒවා තවත් ගෝනි 02 ක් තුළ ද අසුරා තිබියදී සිය භාරයට ගත් බවයි සුරාබදු ස්ථානයේ නිලධාරීන් සඳහන් කළේ.

මෙම ලොරි රථය තුළ රියැදුරුවරයා පමණක් සිටි අතර , ඔහු 30 හැවිරිදි වියේ පසුවන පොළොන්නරුව ප්‍රදේශයේ පදිංචිකරුවෙක්.

මේ පිළිබඳ වැඩිදුර විමර්ශන කටයුතු සඳහා මෙම මත්ද්‍රව්‍ය තොගය සමග රියැදුරුවරයා අද (21) දින මීගමුව මහේස්ත්‍රාත් අධිකරණය වෙත ඉදිරිපත් කිරීමට නියමිතයි.