ස්ත්‍රී දූෂණ චෝදනාවලට වරදකරු වූ මාධ්‍යවේදියෙක් 10 වසරක් හිරේට

මෙම නඩුව සම්බන්ධයෙන් 2021 වසරේ ලබාදී තිබූ නිදොස් කිරීමේ තීන්දුව අවලංගු කරමින් බොම්බායි මහාධිකරණයේ ගෝවා විනිසුරු මඩුල්ල මෙම තීන්දුව ලබාදී ඇත.

ස්ත්‍රී දූෂණය සහ ලිංගික අතවර සම්බන්ධ ඉන්දීය නීති ප්‍රතිපාදන යටතේ තේජ්පාල් වරදකරු බවට තීන්දු කළ අධිකරණය, වසර 10ක සිරදඬුවමට අමතරව ඉන්දීය රුපියල් මිලියනයකට අධික දඩ මුදලක්ද ගෙවීමට නියෝග කර ඇත.

ටාරුන් තේජ්පාල් මෙම චෝදනා දිගින් දිගටම ප්‍රතික්ෂේප කර ඇති අතර, දඬුවම් නියම කිරීමට පෙර ප්‍රකාශ කර තිබුණේ මෙම තීන්දුවට එරෙහිව ඉන්දීය ශ්‍රේෂ්ඨාධිකරණයට අභියාචනයක් ඉදිරිපත් කරන බවයි.

2013 වසරේදී එල්ල වූ මෙම චෝදනා ඉන්දියාව පුරා දැඩි අවධානයට ලක්විය. ඊට වසරකට පෙර දිල්ලියේ තරුණියක සමූහ දූෂණයට ලක්කර ඝාතනය කිරීමේ සිද්ධියෙන් අනතුරුව ඉන්දියාව තුළ කාන්තා ආරක්ෂාව සහ ලිංගික හිංසනය පිළිබඳ විශාල සමාජ සංවාදයක්ද මතු වී තිබුණි.

ඉන්දීය නීතිය අනුව අනන්‍යතාව හෙළි කළ නොහැකි පැමිණිලිකාරිය ප්‍රකාශ කර ඇත්තේ, 2013 නොවැම්බර් මාසයේ ගෝවාහි පැවති තෙහෙල්කා සඟරාවේ ජාත්‍යන්තර සමුළුවක් අතරතුර, සෝපානයක් (lift) තුළදී ටාරුන් තේජ්පාල් තමන්ට ලිංගික අතවර කළ බවයි.

එම සමුළුව සඳහා හොලිවුඩ් නළු Robert De Niro ඇතුළු ජාත්‍යන්තර ප්‍රසිද්ධ පුද්ගලයින් රැසක්ද සහභාගී වී සිටි බව විදෙස් මාධ්‍ය වාර්තා කරයි.