ඇප බඳින්න දඩ ගෙවන්න මුදල් නැතිව තුන්දහසක් නිකරුණේ හිරේ

වාර්තාවට අනුව, දිවයින පුරා බන්ධනාගාර 28ක රැඳී සිටින සිරකරුවන් 1,940 දෙනෙකු දඩ මුදල් ගෙවීමට නොහැකි වීම නිසා නිදහස අහිමිව සිටින අතර, තවත් බන්ධනාගාර 21ක රැඳවියන් 1,431 දෙනෙකු ඇප මුදල් තැන්පත් කිරීමට නොහැකි වීම හේතුවෙන් තවදුරටත් රඳවා සිටී.

එමෙන්ම, ඇප ලබාදී මාස පහකට වැඩි කාලයක් ගතවී තිබියදීත් තවමත් බන්ධනාගාරවල රැඳී සිටින පුද්ගලයින් 325 දෙනෙකු පිළිබඳවද විගණන වාර්තාව අනාවරණය කරයි. මෙම තත්ත්වය පසුගිය වසර වන විට දිවයිනේ බන්ධනාගාර ආයතන 21කින් වාර්තා වී තිබූ බවද එහි සඳහන් වේ.

විගණන විමර්ශනවලදී අනාවරණය වී ඇත්තේ මූල්‍ය අපහසුතා පමණක් නොව, ඇතැම් රැඳවියන්ට ඇප කොන්දේසි සපුරාලීමට නොහැකි වීම සහ ඇප ලබාදීම සඳහා ඥාතීන් හෝ ඇපකරුවන් ඉදිරිපත් නොවීමද මෙම තත්ත්වයට බලපා ඇති ප්‍රධාන හේතු අතර වන බවයි.

ජාතික විගණන කාර්යාලය පෙන්වා දෙන්නේ, මෙලෙස ඇප සහ දඩ මුදල් ගෙවීමට නොහැකිව රැඳවියන් දිගු කාලයක් බන්ධනාගාරවල රඳවා තැබීම, බන්ධනාගාරවල පවතින අධික තදබදයට ප්‍රධාන හේතුවක් වී ඇති බවයි.