බිත්තර ආශ්‍රිත නිෂ්පාදනවල මිල අඩු කරන්නැයි ඉල්ලයි

පාරිභෝගික කටයුතු පිළිබඳ අධිකාරිය මෙම ඉල්ලීම සිදු කරනු ලබන්නේ මේ වන විට වෙළඳපොලේ බිත්තරයක මිල සැලකිය යුතු පහත බැස ඇති බැවිනි.

එමෙන්ම බිත්තර ආශ්‍රිත නිෂ්පාදන අළෙවි කරන මිල පැහැදිළිව ප්‍රදර්ශනය කළ යුතු බව පාරිභෝගික කටයුතු පිළිබඳ අධිකාරිය දැනුම් දෙනු ලබයි.

මිල ප්‍රදර්ශනය නොකරන වෙළඳුන් සොයා වැටලීම් ක්‍රියාත්මක බව ද ඔවුන්ට එරෙහිව නිතිය ක්‍රියාත්මක කරන බව පාරිභෝගික කටයුතු පිළිබඳ අධිකාරිය සඳහන් කරන ලදි.

බිත්තරයක් 30ට දෙනවා - සමස්ත ලංකා බිත්තර නිෂ්පාදකයින්ගේ සංගමය

පාසල් දුවා දරුවන්ගේ පෝෂණ අවශ්‍යතාවය පිරිමසාලීම වෙනුවෙන් ප්‍රවාහනය ද ඇතුළත්ව බිත්තරයක් රුපියල් 30ක මුදලට ලබාදීමට සමස්ත ලංකා බිත්තර නිෂ්පාදකයින්ගේ සංගමය තීරණය කර ඇතැයි එම සංගමයේ සභාපති සරත් රත්නායක පවසයි.          

"ඉකුත් කාලයේ බිත්තරයක් රුපියල් 65-70 අතර ගියා. එහෙත් සංගමයක් විදිහට මේ කර්මාන්තයත් ආරක්‍ෂා කරගන පාරිභෝගිකයාටත් බිත්තරයක් රුපියල් 45 අගයට ලබාදෙන්න අපි අපමණ වෙහෙසක් ගත්තා. බිත්තර මිල අඩු වැඩි වෙන්නේ අපි ඕන ඕන විදිහට කරන දෙයක් නිසා නෙවෙයි. අදවන විට බිත්තරය ගොවිපොලෙන් රුපියල් 30 සීමාව දක්වා අඩුවෙලා තියනවා. ඉදිරියෙදී මේ මිල තවත් අඩුවේවි කියලයි අපිට පේන්නෙ.  

මිල අඩුවෙන්නෙත් අපි නොහිතන කරුණු එක්ක. ලංකාවට මව් සතුන් අවශ්‍යතාවය අසූ පන්දහසක් පමණ. එයින් තමයි බිත්තර ලක්‍ෂ 75ක් පමණ නිෂ්පාදනය කරගන්න පුලුවන් වුණේ. එහෙත් මේ වනවිට මවු සතුන් එක්ලක්‍ෂ හතලිස් දෙදහසක් ගෙනත් තියනවා. මසකට අවශ්‍ය පැටවු ලක්‍ෂ හත හමාරක් වුවත් එහිදී පැටවු ලක්‍ෂ 12ක් පමණ බිහිවෙනවා. ඒ අනුව සෑම මසකම බිත්තර නිෂ්පාදනය ලක්‍ෂ 5 බැගින් වැඩිවෙනවා. නමුත් පරිභෝජනය ඊට අනුරූපීව වැඩිවෙන්නෙ නැහැනේ. ඉකුත් ජනපතිවරණ සමයේ දී පාක්‍ෂිකයන්ට දෙන ආහාර වේලට පක්‍ෂ ප්‍රතිපක්‍ෂ කවුරුත් බිත්තර එකකාසු කිරීම නිසා බිත්තර අලෙවිය වැඩිවුණා. දැන් ඒක නැවතුන නිසා බිත්තර අතිරික්තයක් පවතිනවා. ඒ නිසා තමයි බිත්තර මිල අඩුවෙලා තියෙන්නේ.    

අනිත් කාරනාව අද වනවට බිත්තර කර්මාන්තයට නව ව්‍යවසායකයින් එකතුවුණා. එය හොඳ තත්වයක්. ඒ අයත් නිෂ්පාදන කාර්යාවලියට ඒ විදිහට එකතුවුණ නිසා කොහොමත් මසක බිත්තර ප්‍රමාණය ලක්‍ෂ5කින් පමණ වැඩිවුණා. මේ සෑම හේතුවක්ම බලපානවා බිත්තර මිල සඳහා. අපිත් කැමති අපේ නිෂ්පාදන පාරිභොගිකයින්ගේ පෝෂණ අවශ්‍යතා වෙනුවෙන් ලබාගන්නවාට. එහෙත් කර්මාන්තයක් විදිහට මේක වැටෙන්න දීලා බැහැ. එහෙම වුණොත් කුඩා පරිමාණ ගොවීන් මේ කර්මාන්තය අත් හරිනවා. එතකොට බිත්තර ප්‍රමාණය අඩුවෙනවා. අන්න මිල ඉහළහා හැකි හේතු.

ඒ වගේම අපි ගැබිණි මව් පෝෂණ මල්ලට බිත්තර නොමිලයේ දුන්නා. පාසල් සිසුන්ටත් නොමිලයේ දුන්නා. ඒ වගේම සහනදායී මිලට අපි පාසැල් සිසුන්ට බිත්තර දුන්නා. අපි ඒ දේවල් සමාජය වෙනුවෙන් සිදුකළා. ඒ නිසා රජය වැඩ පිළිවෙලක් සකසනවානම් අපිට හැකියාව තියනවා ළමා මන්දපෝෂණය තුරන්කිරීම වෙනුවෙන් පාසැල් සිසුන්ට රුපියල් 30කට බිත්තරයක් අදාළ ස්ථානවලට ප්‍රවාහනය කරලා දෙන්නත්."

මේ වනවිට වෙළඳපොළෙහි බිතරයක මිල රුපියල් 28ත් - 32ත් අතර වන බව වාර්තා වේ.