දෙසැම්බර් 9,10 සහ 11 වනවිට වැසි තත්ත්වයේ වැඩිවීමක්

එහි අධ්‍යක්ෂ ජනරාල්, අතුල කරුණානායක පවසා සිටියේ, මෙම කාලයේ දී සුළඟේ වේගය ද වැඩි වන බවය.

"අපිට දැනට පේනවා ඉදිරි දින කීපය ගත්තම විශේෂයෙන්ම නමවෙනිදායින් පස්සේ මේ ඊසාන දිග මෝසං කාල පරිච්ඡේදය සක්‍රියභාවයක් පෙන්නනවා. ඒ කියන්නේ ඒ සුලං හමන වේගයේ වැඩිවීමක් පෙන්නුම් කරනවා. එතකොට මේ තත්ත්වය යටතේ 9, 10, 11, 12 වගේ දිනයන් වෙනකොට දිවයින තුළ තියෙන වර්ෂා පතනයේ වැඩිවීමක් අපිට අපේක්ෂා කරන්න පුළුවන්. මේ වර්ෂා පතනය බොහෝවිට අපේක්ෂා කරන්න පුළුවන් වැඩිපැත්ත තමා උතුරු, උතුරු මැද, වයඹ, නැගෙනහිර වගේ පළත් වල සහ ඌව වගේ පළත් වල. සෑම අවස්ථාවකම වැසි හෝ ගිගුරුම් සහිත වැසි තත්ත්ව නිර්මාණය වෙනවා. සාමාන්‍යයෙන් ඒ ඒ පළාත් වල අහස වලාකුලින් බරව තියෙන්න පුළුවන්. අඳුරු ස්වභාවය තියෙන්න පුළුවන්. එම පළාත් වල සමහර ස්ථානවලට මිලිමීටර් 7500 මට්ටමේ වර්ෂාපතන ලැබීමේ හැකියාවන් තියෙනවා."

දිවයිනේ සෙසු පළාත්වලට මෙම කාලසීමාව තුළ විශේෂයෙන්ම නිරිතදිග කොටසට ගිගුරුම් සහිත වැසි නොමැති වුවත් වැසි ඇති විය හැකි බව ද අතුල කරුණානායක කියා සිටියේය.

මේ අතර, ලංකාවට ගිනිකොණ දිශාවෙන් වූ වායුගෝලයේ කැලඹිලි ස්වභාවයක් පවතින බවත් ඔක්තෝබර් සිට දෙසැම්බර් දක්වා මෙම තත්ත්වය තිබිය හැකි බවත් ඔහු වැඩිදුරටත් පැවසීය.

දිවයින අවට පහළ වායු ගෝලයේ කැලඹිලි ස්වභාවය ඉස්මතු වීමත් ඊශානදිග මෝසමේ සක්‍රීයභාවයට හේතු වී ඇතැයි පැවසු අතුල කරුණානායක , බෙංගාල බොක්කේ ඇතිවන මෙම කැලඹිලි ස්වභාවය දිවයිනට ඈතින් වූ ගිනිකොණ දිග දිශාවේ අන්දමන් දූපත් ආසන්නයේ පවතින බව සඳහන් කළේය.

මේ හේතුවෙන් දෙසැම්බර් 9 වනදායින් පසුව මුහුද රළු විය හැකි බවත් ධීවරයින් හා නාවිකයින් ඉදිරි නිවේදන පිළිබඳ අවධානයෙන් සිටින ලෙසත් කාලගුණවිද්‍යා දෙපාර්තමේන්තුවේ, අධ්‍යක්ෂ ජනරාල් අතුල කරුණානායක ජනතාවගෙන් ඉල්ලා සිටී.