සජිත් ගෙන් යාපනයට ජාත්‍යන්තර ක්‍රිකට් ක්‍රීඩාංගනයක්

ඒ හරහා එම ප්‍රදේශයේ ආර්ථිකය ගොඩනගන්න, කර්මාන්ත දියුණු කරන්න, සංචාරක කර්මාන්තය දියුණු කරන්න මෙන්ම දේශීය ආර්ථික ක්‍රියාකාරීත්වය වැඩි කිරිමට ඉවහල් වන බවයි සජිත් ප්‍රේමදාස පෙන්වා දෙන්නේ.

මීට වසර කිහිපයකට පෙර යාපනය දිස්ත්‍රික්කයේ ජාත්‍යන්තර ක්‍රිකට් ක්‍රීඩාංගනයක් ඉදිකිරිමට යහපාලන රජයේ දී සාකච්ඡා වූ බවත් වර්තමානයේ එහි තත්ත්වය සොයා බැලීමට වේලනෙයි ප්‍රදේශයේ මණ්ඩතිව් බටහිර කොට්ඨාසයට තමා ගිය අවස්ථාවේ දැක ගැනීමට හැකි වූයේ දැනටමත් ඒ සඳහා අක්කර 50ක ඉඩමක් වෙන් කර ඇති මුත් ජාත්‍යන්තර ක්‍රිකට් ක්‍රීඩාංගනය ඉදි කිරීමේ වැඩපිළිවෙළ ආරම්භ කර නොමැති බව යැයි ඔහු සඳහන් කළේය.

විපක්ෂ නායක සජිත් ප්‍රේමදාස මේ බව කියා සිටියේ (ජුනි 12) යාපනය කෝපායි නීර්වේලි අත්තියර් හින්දු විද්‍යාලයට සක්වල සුහුරු පන්ති කාමර වැඩසටහනේ 233 වැනි අදියර යටතේ රුපියල් 1,177,000 වටිනා සුහුරු පන්ති කාමරයක් පරිත්‍යාග කිරීමේ අවස්ථාවට එක්වෙමිනි.

රාජ්‍ය හා පෞද්ගලික හවුල්කාරීත්වය යටතේ ව්‍යාපෘතියක් ලෙස මෙම ක්‍රීඩාංගනය පහසුවෙන් ඉදිකළ හැකි බවත් ආර්. ප්‍රේමදාස ක්‍රීඩාංගනය පවා නිර්මාණය වූයේ එවැනි ආකාරයට බව ද ඔහු මෙහිදී කියා සිටියේය.

පෞද්ගලික ධානපතියන්ගේ ආධාර උපකාර ගෙන ආර්. ප්‍රේමදාස ක්‍රීඩාංගනය ගොඩනැගූ ආකාරයටම යාපනය දිස්ත්‍රික්කයේ ජාත්‍යන්තර ක්‍රිකට් ක්‍රීඩාංගනය ඉදිකරන බවයි සජබ නායකයා තවදුරටත් ප්‍රකාශ කර ඇත්තේ.

යාපනය දිස්ත්‍රික්කයේ ජාත්‍යන්තර ක්‍රිකට් ක්‍රීඩාංගනය කියන සිහිනය සැබෑ කිරීමේ වැඩපිළිවෙළ සමගි ජන බලවේග රජයක් තුළ ක්‍රියාත්මක කරනා බවට ද හෙතෙම සහතික වී ඇත.

(චතුරංග මේදිස්)

The Leader Lk